ନିର୍ବାଚନ ଆୟୋଗ ଦେଶବ୍ୟାପୀ ଭୋଟର ହେଲ୍ପଲାଇନ୍ ସକ୍ରିୟ — ୧୯୫୦ ନମ୍ବରରେ ମିଳିବ ସମସ୍ତ ସହାୟତା

ନୂଆଦିଲ୍ଲୀ : ଭାରତ ନିର୍ବାଚନ ଆୟୋଗ (ECI) ନାଗରିକମାନଙ୍କ ନିର୍ବାଚନ ସମ୍ବନ୍ଧୀୟ ପ୍ରଶ୍ନ, ନୂଆ ଭୋଟର ପଞ୍ଜିକରଣ ଓ ଅଭିଯୋଗର ତ୍ୱରିତ ସମାଧାନ ପାଇଁ ଜାତୀୟ ଭୋଟର ହେଲ୍ପଲାଇନ୍ ୧୯୫୦ ସହିତ ସମସ୍ତ ୩୬ଟି ରାଜ୍ୟ ଏବଂ ଜିଲ୍ଲାସ୍ତରୀୟ ହେଲ୍ପଲାଇନ୍ ସକ୍ରିୟ କରିଛି।

ଜାତୀୟ ଯୋଗାଯୋଗ କେନ୍ଦ୍ର (NCC) ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳ ପାଇଁ କେନ୍ଦ୍ରୀୟ ହେଲ୍ପଲାଇନ୍ ଭାବେ କାର୍ଯ୍ୟ କରିବ। ପ୍ରତିଦିନ ସକାଳ ୮ଟାରୁ ରାତି ୮ଟା ପର୍ଯ୍ୟନ୍ତ, ଟୋଲ୍-ଫ୍ରି ନମ୍ବର ୧୮୦୦-୧୧-୧୯୫୦ ରେ ନାଗରିକମାନେ ନିଜ ପ୍ରଶ୍ନ ଓ ଅଭିଯୋଗ ଦାଖଲ କରିପାରିବେ। ସମସ୍ତ କଲ୍ ପ୍ରଶିକ୍ଷିତ କାର୍ଯ୍ୟନିର୍ବାହୀମାନଙ୍କ ଦ୍ୱାରା ପରିଚାଳିତ ହେବ ଏବଂ ସେମାନେ ଆଞ୍ଚଳିକ ଭାଷାରେ ସହାୟତା ଯୋଗାଇବେ।

ଅଭିଯୋଗ ନିଷ୍ପତ୍ତିରେ ତ୍ୱରାନ୍ବିତତା ଆଣିବା ପାଇଁ ଆୟୋଗ ପ୍ରତ୍ୟେକ ରାଜ୍ୟ ଓ ଜିଲ୍ଲାକୁ ଯଥାକ୍ରମେ ରାଜ୍ୟ ଯୋଗାଯୋଗ କେନ୍ଦ୍ର (SCC) ଏବଂ ଜିଲ୍ଲା ଯୋଗାଯୋଗ କେନ୍ଦ୍ର (DCC) ସ୍ଥାପନ କରିବାକୁ ନିର୍ଦ୍ଦେଶ ଜାରି କରିଛି। ସମସ୍ତ ଅଭିଯୋଗ ଜାତୀୟ ଅଭିଯୋଗ ସେବା ପୋର୍ଟାଲ୍ (NGSP 2.0) ମାଧ୍ୟମରେ ରେକର୍ଡ ଏବଂ ଟ୍ରାକ୍ ହେବ।

ନାଗରିକମାନଙ୍କ ସହିତ ସିଧାସଳଖ ସମ୍ପର୍କ ସୁନିଶ୍ଚିତ କରିବା ପାଇଁ, ଆୟୋଗ ‘ବୁକ୍-ଏ-କଲ୍ ୱିଥ ବି.ଏଲ.ଓ’ ସୁବିଧା ଆରମ୍ଭ କରିଛି, ଯାହା ମାଧ୍ୟମରେ ନାଗରିକମାନେ ଇ.ସି.ଆଇ.ନେଟ୍ (ECINET) ପ୍ଲାଟଫର୍ମ ଦ୍ୱାରା ସିଧାସଳଖ ନିଜ ବୁଥ୍ ସ୍ତରୀୟ ଅଧିକାରୀ (BLO) ସହିତ ଯୋଗାଯୋଗ କରିପାରିବେ।

ନିର୍ବାଚନ ଆୟୋଗ ସମସ୍ତ CEO, DEO ଓ ERO ମାନଙ୍କୁ ନିୟମିତ ଭାବରେ ଅଭିଯୋଗ ନିଷ୍ପତ୍ତି ତଦାରଖ କରିବା ଏବଂ ୪୮ ଘଣ୍ଟା ମଧ୍ୟରେ ସମାଧାନ ସୁନିଶ୍ଚିତ କରିବାକୁ ନିର୍ଦ୍ଦେଶ ଦେଇଛି।

ଅଭିଯୋଗ ଦାଖଲ ପାଇଁ ନାଗରିକମାନେ complaints@eci.gov.in କୁ ଇ-ମେଲ୍ ପଠାଇପାରିବେ।

ନିର୍ବାଚନ ଆୟୋଗ ସମସ୍ତ ଭୋଟରଙ୍କୁ ଆହ୍ୱାନ କରିଛି ଯେ, ନିଜର ପ୍ରଶ୍ନ ଓ ଅଭିଯୋଗର ତୁରନ୍ତ ସମାଧାନ ପାଇଁ ‘ବୁକ୍-ଏ-କଲ୍ ୱିଥ ବି.ଏଲ.ଓ’ ଏବଂ ୧୯୫୦ ଭୋଟର ହେଲ୍ପଲାଇନ୍ ବ୍ୟବହାର କରନ୍ତୁ। (PNS)