“ଉଚ୍ଚଶିକ୍ଷାରେ ଗୁଣାତ୍ମକ ପରିବର୍ତ୍ତନ ପାଇଁ ନେତୃତ୍ୱ ଆବଶ୍ୟକ” — ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ

PNS Bureau :- ଉଚ୍ଚଶିକ୍ଷା ବିଭାଗ, ଓଡିଶା ରାଜ୍ୟ ଉଚ୍ଚଶିକ୍ଷା ପରିଷଦ ଓ ଜାଭିୟର ଇନଷ୍ଟିଚ୍ୟୁଟ ଅଫ୍ ମ୍ୟାନେଜମେଣ୍ଟ (XIM) ଭୁବନେଶ୍ୱରଙ୍କ ମିଳିତ ପ୍ରୟାସରେ ମହାବିଦ୍ୟାଳୟ ଅଧ୍ୟକ୍ଷ ଓ ବରିଷ୍ଠ ଅଧ୍ୟାପକମାନଙ୍କ ପାଇଁ ଦକ୍ଷତା ଓ ନେତୃତ୍ୱ ବିକାଶ କର୍ମଶାଳା ଆୟୋଜିତ ହୋଇଛି। ଅକ୍ଟୋବର ୨୭ ଠାରୁ ନଭେମ୍ବର ୧ ପର୍ଯ୍ୟନ୍ତ ଚାଲିଥିବା ଏହି କର୍ମଶାଳାରେ ରାଜ୍ୟର ୩୬ଟି ସରକାରୀ ମହାବିଦ୍ୟାଳୟର ପ୍ରତିନିଧିମାନେ ଯୋଗଦେଇଥିଲେ।

କର୍ମଶାଳାରେ ଜାତୀୟ ଶିକ୍ଷା ନୀତି ୨୦୨୦, ପ୍ରଶାସନିକ ଓ ବିତ୍ତୀୟ ପରିଚାଳନା, ଦକ୍ଷତା ଆଧାରିତ ମୂଲ୍ୟାଙ୍କନ, ଡିଜିଟାଲ ଶିକ୍ଷା ଓ ଉଚ୍ଚକୋଟୀର ଗବେଷଣା ଭଳି ବିଭିନ୍ନ ବିଷୟ ଉପରେ ପ୍ରଶିକ୍ଷଣ ଦିଆଯାଇଛି।

ଆଜି ଉଦ୍ୟାପନୀ ସମାରୋହରେ ମୁଖ୍ୟ ଅତିଥି ଭାବେ ଉପସ୍ଥିତ ଥିବା ଉଚ୍ଚଶିକ୍ଷା ମନ୍ତ୍ରୀ ଶ୍ରୀ ସୂର୍ଯ୍ୟବଂଶୀ ସୂରଜ କହିଥିଲେ, “ବିଶ୍ୱ ସ୍ତରୀୟ ଶିକ୍ଷା ପରିବେଶ ଓ ଗୁଣାତ୍ମକ ଶିକ୍ଷା ଦେଇ ଆମ ଛାତ୍ରଛାତ୍ରୀଙ୍କୁ ସ୍ୱର୍ଣ୍ଣିମ ଭବିଷ୍ୟତ ଦେବା ହେଉଛି ଆମ ଲକ୍ଷ୍ୟ। ଶୈକ୍ଷିକ ସମାଜ ଆଗକୁ ଆସି ଏହି ପରିବର୍ତ୍ତନର ନେତୃତ୍ୱ ନେବା ଆବଶ୍ୟକ।”

ସେ ଅଧିକ କହିଥିଲେ ଯେ ଓଡ଼ିଶା ସରକାର ଜାତୀୟ ଶିକ୍ଷା ନୀତି ୨୦୨୦ର ପ୍ରଣୟନ, ପିଏମ–ଉଷା ଯୋଜନାର ଲାଗୁକରଣ, ନୂତନ ସରକାରୀ ସ୍ନାତକ ମହାବିଦ୍ୟାଳୟ ସ୍ଥାପନ, ଦକ୍ଷତା ବିକାଶ ଓ ନିଯୁକ୍ତି ସୁଯୋଗ ସୃଷ୍ଟି ପାଇଁ ଅନେକ ଯୁଗାନ୍ତକାରୀ ପଦକ୍ଷେପ ନେଇଛି।

ସମାରୋହରେ ଉଚ୍ଚଶିକ୍ଷା ବିଭାଗର ଅତିରିକ୍ତ ଶାସନ ସଚିବ ଶ୍ରୀ ଧରଣୀଧର ନନ୍ଦ, ଶ୍ରୀମତୀ ପ୍ରତିଭା ସାହୁ, ଜାଭିୟର ଇନଷ୍ଟିଚ୍ୟୁଟର ରେଜିଷ୍ଟାର ଏସ. ଆନ୍ଥୋନି ଓ ଆସୋସିଏଟ ଡିନ୍ ଡ଼. ଏସ. ଏସ. ଗଣେଶ ମଧ୍ୟ ଉପସ୍ଥିତ ଥିଲେ।(PNS)