PNS Bureau :- ନୂଆପଡା ଉପନିର୍ବାଚନକୁ ନେଇ ବିଜେଡି ଶିବିରରେ ହତାଶା ଓ ଅସ୍ଥିରତା ଦେଖାଯାଇଛି ବୋଲି ବିଜେପି ଅଭିଯୋଗ କରିଛି। ବିଜେପି ଜନଜାତି ମୋର୍ଚ୍ଚାର ରାଷ୍ଟ୍ରୀୟ କାର୍ଯ୍ୟକାରିଣୀ ସଦସ୍ୟ ଓ ବରିଷ୍ଠ ନେତା ଖାମସିଂହ ମାଝୀ ଆଜି ଜିଲ୍ଲା କାର୍ଯ୍ୟାଳୟରେ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ବିଜେଡି ନେତାମାନେ ଭୟ ଓ ହିଂସାର ଆଶ୍ରୟ ନେଇ ଲୋକମାନଙ୍କୁ ସଭାରେ ନେବାକୁ ବାଧ୍ୟ କରୁଛନ୍ତି।
ଶ୍ରୀ ମାଝୀ ଅଭିଯୋଗ କରିଛନ୍ତି ଯେ, ବିଜେଡି ନେତା ବବି ଦାସ ଓ ତାଙ୍କ ସହଯୋଗୀମାନେ ଗତ ୩୦ ଅକ୍ଟୋବରେ କୋମନା ବ୍ଲକର ପାଇକପଡାର ଜିତୁ ଆଡବାଙ୍ଗଙ୍କୁ ମାଡ ମାରି ଓ ମୃତ୍ୟୁ ଧମକ ଦେଇଥିଲେ। ଏଥିରେ ଖରିଆର ବିଧାୟକ ଅଧିରାଜ ପାଣିଗ୍ରାହୀ ଓ ବିଜେଡି ଆଶାୟୀ ପ୍ରାର୍ଥୀ ମନୋଜ ମିଶ୍ରଙ୍କ ମିଳିତ ଭୂମିକା ଥିବା ଅଭିଯୋଗ ହୋଇଛି।
ସେ କହିଛନ୍ତି, “ବିଜେଡି ଏତେ ତଳ ସ୍ତରକୁ ଖସିଯାଇଛି ଯେ ନିଜ କର୍ମୀମାନଙ୍କୁ ମଧ୍ୟ ଭୟଭୀତ କରୁଛି। ନବୀନ ପଟ୍ଟନାୟକ ନିଜେ ଅହିଂସାର ଦ୍ୱାହି ଦେଉଥିଲେ ମଧ୍ୟ ଏହି ଘଟଣାରେ ନିରବ ରହିବା ତାଙ୍କ ଦୋମୁହାଁ ନୀତିକୁ ଦେଖାଉଛି।”
ବିଜେପି ନେତା ଏହି ଘଟଣାକୁ ଏକ “ଡୁବୁଥିବା ଜାହାଜର ହତାଶା” ବୋଲି ବର୍ଣ୍ଣନା କରିଛନ୍ତି ଓ କହିଛନ୍ତି ଯେ, ନୂଆପଡାବାସୀ ଆଗାମୀ ଉପନିର୍ବାଚନରେ ଏହାର ଉଚିତ ଜବାବ ଦେବେ।
ସେ କହିଛନ୍ତି ଯେ, ଏହି ଅଭିଯୋଗ ସହ ରାଜ୍ୟ ନିର୍ବାଚନ ଅଧିକାରୀଙ୍କୁ ଭେଟି ଯଥାଚିତ କାର୍ଯ୍ୟାନୁଷ୍ଠାନ ପାଇଁ ଦାବି କରାଯିବ। ସାମ୍ବାଦିକ ସମ୍ମିଳନୀରେ ବିଜେପି ରାଜ୍ୟ ପ୍ରବକ୍ତା ମାନସ ରଞ୍ଜନ ବକ୍ସି ମଧ୍ୟ ଉପସ୍ଥିତ ଥିଲେ।(PNS)
