🌍 ସୁଦାନରେ ପଣବନ୍ଦୀ ଓଡ଼ିଆ ଯୁବକ ଆଦର୍ଶ ବେହେରାଙ୍କ ଉଦ୍ଧାର ପାଇଁ ରାଜ୍ୟ ସରକାରର ପଦକ୍ଷେପ

PNS Bureau :- ସୁଦାନରେ ପଣବନ୍ଦୀ ହୋଇଥିବା ଓଡ଼ିଆ ଯୁବକ ଆଦର୍ଶ କୁମାର ବେହେରାଙ୍କ ଉଦ୍ଧାର ପାଇଁ ଓଡ଼ିଶା ସରକାର ଆଜି କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରାଳୟକୁ ଅନୁରୋଧ କରିଛି। ଜଗତସିଂହପୁର ଜିଲ୍ଲାର ତିର୍ତ୍ତୋଲ ଥାନା ଅଧୀନସ୍ଥ କୋଟକଣା ଗ୍ରାମର ଆଦର୍ଶ, 2022 ମସିହାରୁ ସୁଦାନରେ କାମ କରୁଛନ୍ତି।

🔹 ମୁଖ୍ୟମନ୍ତ୍ରୀଙ୍କ ତତ୍କାଳ ପଦକ୍ଷେପ

ଗଣମାଧ୍ୟମରେ ଆଦର୍ଶଙ୍କ ପଣବନ୍ଦୀ ହେବା ସମ୍ପର୍କୀୟ ଖବର ଆସିବା ସହିତ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତତ୍କାଳ ବରିଷ୍ଠ ଅଧିକାରୀମାନଙ୍କୁ ଏହି ମାମଲାରେ ଉପଯୁକ୍ତ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଥିଲେ।

ଏହି ପରିପ୍ରେକ୍ଷ୍ୟରେ, ଗୁଇନ୍ଦା ବିଭାଗର ମହାନିର୍ଦ୍ଦେଶକ କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରାଳୟକୁ ପତ୍ର ଲେଖି ଆଦର୍ଶଙ୍କୁ ସୁରକ୍ଷିତ ଭାବେ ଫେରାଇ ଆଣିବା ପାଇଁ ତ୍ୱରିତ କାର୍ଯ୍ୟାନୁଷ୍ଠାନ ନେବାର ଅନୁରୋଧ କରିଛନ୍ତି।

🔹 କେନ୍ଦ୍ର ସହ ସମନ୍ୱୟ

ନୂଆଦିଲ୍ଲୀରେ ଅବସ୍ଥିତ ଓଡ଼ିଶା ଆବାସିକ କମିଶନର ମଧ୍ୟ କେନ୍ଦ୍ର ବୈଦେଶିକ ମନ୍ତ୍ରାଳୟକୁ ପତ୍ରଲେଖି, ସୁଦାନ ରାଷ୍ଟ୍ରରେ ଅବସ୍ଥିତ ଭାରତୀୟ ଦୂତାବାସ ସହ ସମ୍ପର୍କ ରଖି ଆଦର୍ଶଙ୍କ ଖୋଜଖବର ନେବା ଓ ଉଦ୍ଧାର ନିଶ୍ଚିତ କରିବାକୁ ଅନୁରୋଧ କରିଛନ୍ତି।

🔹 ପରିବାର ପାଇଁ ମୁଖ୍ୟମନ୍ତ୍ରୀଙ୍କ ଆଶ୍ୱାସନ

ଆଦର୍ଶଙ୍କ ପରିବାର ବର୍ଗଙ୍କୁ ମୁଖ୍ୟମନ୍ତ୍ରୀ ଆଶ୍ୱାସନ ଦେଇଛନ୍ତି ଯେ, ସରକାର ତାଙ୍କୁ ସୁରକ୍ଷିତ ଭାବେ ଦେଶକୁ ଫେରାଇ ଆଣିବା ପାଇଁ ସମସ୍ତ ପ୍ରୟାସ କରୁଛି ଏବଂ ସେମାନେ ଧୈର୍ଯ୍ୟ ରଖି ସ୍ଥିତିକୁ ମୁକାବିଲା କରନ୍ତୁ।(PNS)