“ଏକ ଭାରତ, ଶ୍ରେଷ୍ଠ ଭାରତ, ଆତ୍ମନିର୍ଭର ଭାରତ ହେଉଛି ଆମ ସଂକଳ୍ପ” — ବିଜେପି ନେତା ଗୋଲକ ମହାପାତ୍ର

ଭୁବନେଶ୍ୱର :- ଲୌହ ପୁରୁଷ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ୧୫୦ତମ ଜୟନ୍ତୀ ଅବସରରେ ଆଜି ଭୁବନେଶ୍ୱରରେ ଭାରତୀୟ ଜନତା ପାର୍ଟି ପକ୍ଷରୁ ଶ୍ରଦ୍ଧାଞ୍ଜଳି ସଭା ଅନୁଷ୍ଠିତ ହୋଇଥିଲା । ଏହି ସଭାରେ ବିଜେପିର ବରିଷ୍ଠ ନେତା ଗୋଲକ ମହାପାତ୍ର କହିଥିଲେ — “ଜାତି, ଧର୍ମ, ବର୍ଣ୍ଣ ନିର୍ବିଶେଷରେ ଆମେ ସମସ୍ତେ ଭାରତୀୟ; ଏକତା, ସମନ୍ୱୟ ଓ ଦେଶପ୍ରେମର ଭାବନା ହିଁ ସଶକ୍ତ ଭାରତ ଗଢିବାର ଭିତ୍ତି। ‘ଏକ ଭାରତ, ଶ୍ରେଷ୍ଠ ଭାରତ, ଆତ୍ମନିର୍ଭର ଭାରତ’ ହେଉଛି ଆମର ଅଟଳ ସଂକଳ୍ପ।”

ସେ ଉଲ୍ଲେଖ କଲେ ଯେ, ସ୍ୱାଧୀନତା ପରେ ଗଡଜାତ ରାଜ୍ୟଗୁଡ଼ିକୁ ଏକାଠି କରି ଭାରତକୁ ଏକ ବିଶାଳ ରାଷ୍ଟ୍ର ଭାବେ ଗଠନରେ ସର୍ଦ୍ଦାର ପଟେଲଙ୍କ ଅବଦାନ ଅତୁଳନୀୟ ଥିଲା । ସେହି ମହାନ ବରପୁତ୍ରଙ୍କ ସ୍ମୃତିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨୦୧୪ରେ ‘ରନ୍ ଫର୍ ୟୁନିଟି’ ଆରମ୍ଭ କରିଥିଲେ, ଯାହା ପ୍ରତିବର୍ଷ ଅକ୍ଟୋବର ୩୧ରେ ଦେଶବ୍ୟାପୀ ଭାବେ ଆୟୋଜିତ ହୁଏ ।

ରାଜ୍ୟ ବିଜେପି କାର୍ଯ୍ୟାଳୟରେ ଅନୁଷ୍ଠିତ ଏହି ସଭାରେ ରାଜ୍ୟ ଉପସଭାପତି ଡ଼ ଜତିନ୍ ମହାନ୍ତିଙ୍କ ଅଧ୍ୟକ୍ଷତାରେ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା । ଡ଼ ପୂର୍ଣ୍ଣ ଚନ୍ଦ୍ର ମଲ୍ଲିକ ସର୍ଦ୍ଦାର ପଟେଲଙ୍କ ଜୀବନ ଓ ଦେଶଗଠନରେ ତାଙ୍କ ଅସାଧାରଣ ଅବଦାନ ଉପରେ ଆଲୋକପାତ କରିଥିଲେ ।

ଏହି ଅବସରରେ ଡ଼ ଜତିନ୍ ମହାନ୍ତି ଘୋଷଣା କଲେ ଯେ, ଆଜିଠାରୁ ଆସନ୍ତା ନଭେମ୍ବର ୨୬ ପର୍ଯ୍ୟନ୍ତ ରାଜ୍ୟର ୬୩ଟି ସ୍ଥାନରେ ବିଜେପି ପକ୍ଷରୁ ‘ଏକତା ପଦଯାତ୍ରା’ ଅନୁଷ୍ଠିତ ହେବ । ଏହି ପଦଯାତ୍ରାର ମାଧ୍ୟମରେ ଦଳ ସର୍ଦ୍ଦାର ପଟେଲଙ୍କ ଏକତା ଓ ଜାତିଗଠନର ଆଦର୍ଶକୁ ଗ୍ରାମେ ଗ୍ରାମେ ପହଞ୍ଚାଇବାର ଲକ୍ଷ୍ୟ ରଖିଛି । (PNS)