କଟକରେ ସର୍ଦ୍ଦାର ପଟେଲଙ୍କ ୧୫୦ତମ ଜୟନ୍ତୀରେ ରାଜ୍ୟସ୍ତରୀୟ ରାଷ୍ଟ୍ରୀୟ ଏକତା ଦିବସ ପାଳନ — ଆରକ୍ଷୀ ମହାନିର୍ଦ୍ଦେଶକ ବିନୟତୋଷ ମିଶ୍ର ନେଲେ ପ୍ୟାରେଡ ଅଭିବାଦନ

କଟକ, ଅକ୍ଟୋବର ୩୧: ସର୍ଦ୍ଦାର ବଲ୍ଲଭଭାଇ ପଟେଲଙ୍କ ୧୫୦ତମ ଜନ୍ମ ଜୟନ୍ତୀ ଅବସରରେ ଆଜି ପୂର୍ବାହ୍ନରେ କଟକସ୍ଥିତ ଷଷ୍ଠ ଓ.ଏସ.ଏ.ପି ବାଟାଲିୟନ ପରିସରରେ ରାଜ୍ୟସ୍ତରୀୟ ରାଷ୍ଟ୍ରୀୟ ଏକତା ଦିବସ ସମାରୋହ ଉତ୍ସାହମୟ ପରିବେଶରେ ପାଳିତ ହୋଇଯାଇଛି। ଏହି ସମାରୋହରେ ଆରକ୍ଷୀ ମହାନିର୍ଦ୍ଦେଶକ (କ୍ରାଇମ ବ୍ରାଞ୍ଚ) ଶ୍ରୀ ବିନୟତୋଷ ମିଶ୍ର ମୁଖ୍ୟ ଅତିଥି ଭାବେ ଯୋଗଦେଇ ସର୍ଦ୍ଦାର ପଟେଲଙ୍କ ପ୍ରତି ଶ୍ରଦ୍ଧାଞ୍ଜଳି ଅର୍ପଣ କରି ସମ୍ମିଳିତ ପ୍ୟାରେଡରେ ଅଭିବାଦନ ଗ୍ରହଣ କରିଥିଲେ।

ଶ୍ରୀ ମିଶ୍ର ଏହି ଅବସରରେ ଉପସ୍ଥିତ ପୋଲିସ ଅଧିକାରୀ, କର୍ମଚାରୀ ଓ ଯବାନଙ୍କୁ ଦେଶର ଏକତା, ଅଖଣ୍ଡତା ଓ ସୁରକ୍ଷା ସୁଦୃଢ କରିବାପାଇଁ ଶପଥ ପାଠ କରାଇଥିଲେ। ସେ ସର୍ଦ୍ଦାର ପଟେଲଙ୍କ ଜୀବନ ଓ ଦେଶପ୍ରେମ ଉପରେ ଆଲୋକପାତ କରି କହିଥିଲେ ଯେ ସ୍ଵାଧୀନତା ପରେ ୫୬୨ ଦେଶୀୟ ରାଜ୍ୟକୁ ଭାରତରେ ଏକତାର ସୂତ୍ରରେ ବାନ୍ଧିବା ପାଇଁ ସେ ଯେପରି ଅକ୍ଲାନ୍ତ ପରିଶ୍ରମ କରିଥିଲେ, ତାହା ଭାରତୀୟ ଇତିହାସରେ ଅଦ୍ୱିତୀୟ।

ସେ ଆହ୍ୱାନ ଦେଇଥିଲେ ଯେ ପ୍ରତ୍ୟେକ ନାଗରିକ ଭାଇଚାରା, ବନ୍ଧୁତା ଓ ଏକତାର ମନୋଭାବ ନେଇ ଦେଶ ଓ ରାଜ୍ୟର ସାମାଜିକ ଶାନ୍ତି ଓ ସୁରକ୍ଷା ସୁଦୃଢ କରିବାରେ ନିଜ ଅଂଶଦାନ ଦେବା ଆବଶ୍ୟକ।

ଏହି ସମାରୋହରେ ଷଷ୍ଠ ଓ.ଏସ.ଏ.ପି ବାଟାଲିୟନ (କଟକ), ଷଷ୍ଠ ଆଇ.ଆର. ବାଟାଲିୟନ (ଖୋର୍ଦ୍ଧା), ତୃତୀୟ ଆଇ.ଆର. ବାଟାଲିୟନ, ପୋଲିସ କଲର ଓ ବ୍ରାସବ୍ୟାଣ୍ଡ ପାର୍ଟି ଅଂଶଗ୍ରହଣ କରିଥିଲେ। ପ୍ୟାରେଡର ନେତୃତ୍ଵ ତୃତୀୟ ଆଇ.ଆର. ବାଟାଲିୟନର କମାଣ୍ଡାଣ୍ଟ ଶ୍ରୀ ୟାକୁବ ଖାନ ନେଇଥିଲେ।

ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକମାନେ — ଶ୍ରୀ ଏସ.କେ. ପ୍ରିୟଦର୍ଶୀ, ଶ୍ରୀ ଅରୁଣ ବୋଥ୍ରା, ଶ୍ରୀ ସଞ୍ଜୟ କୁମାର, ଶ୍ରୀ ଦୟାଲ ଗଙ୍ଗୱାର ଓ ଶ୍ରୀ ରାଜେଶ କୁମାର ସହିତ ପୋଲିସ ବିଭାଗର ବହୁ ବରିଷ୍ଠ ଅଧିକାରୀ ଓ କର୍ମଚାରୀ ଉପସ୍ଥିତ ଥିଲେ। ରାଜ୍ୟର ସମସ୍ତ ପୋଲିସ ଜିଲ୍ଲାରେ ମଧ୍ୟ ଏହି ଅବସରରେ ଏକତା ଦିବସ ପାଳନ ସହ “ରନ୍ ଫର ୟୁନିଟି”, ଚିତ୍ରାଙ୍କନ ଓ ପ୍ରବନ୍ଧ ପ୍ରତିଯୋଗିତା ଆୟୋଜିତ ହୋଇଥିଲା।