ନୂଆପଡା ଉପନିର୍ବାଚନରେ ବିଜେଡି-ବିଜେପି ମିଳିତ ମୁହାଁ, କଂଗ୍ରେସ ଏକାକୀ ଯୁଦ୍ଧ: ଜୟଦେବ ଜେନା

🟥 ନୂଆପଡା ଉପନିର୍ବାଚନ ଦ୍ବିମୁଖୀ, ବିଜେଡି-ବିଜେପି ଏକାତ୍ମ — କଂଗ୍ରେସ ଏକାକୀ ଲଢ଼ୁଛି : ଜୟଦେବ ଜେନା

ନବୀନଙ୍କ ରଙ୍ଗ ହରାଇଛି, ଲୋକେ ବୁଝିସାରିଛନ୍ତି ବିଜେଡିର ଠକାମୀ : ପୂର୍ବତନ ମନ୍ତ୍ରୀ ଦେବାଶିଷ ନାୟକଙ୍କ ଅଭିଯୋଗ

PNS Bureau:- ନୂଆପଡା ଉପନିର୍ବାଚନକୁ ଆଖି ଆଗରେ ରଖି ପ୍ରତିଦିନ କଂଗ୍ରେସ ଭବନରେ ଆୟୋଜିତ ସାମ୍ବାଦିକ ସମ୍ମିଳନୀରେ ଆଜି ପୂର୍ବତନ ପିସିସି ସଭାପତି ଜୟଦେବ ଜେନା କଠୋର ଆକ୍ରମଣ ଶେଳୀରେ ବିଜେଡି ଓ ବିଜେପି ଉପରେ ତୀବ୍ର ଆକ୍ରୋଶ ପ୍ରକାଶ କରିଛନ୍ତି।

ସେ କହିଛନ୍ତି ଯେ, “ନବୀନ ପଟ୍ଟନାୟକ ୨୪ ବର୍ଷ ଧରି ନୂଆପଡାକୁ ଭୁଲି ଯାଇଥିଲେ, ଏବେ ନିର୍ବାଚନ ଦେଖି ହଠାତ୍ ମନେ ପଡିଗଲା। ସେଇ ନବୀନଙ୍କ ରଙ୍ଗ ଆଉ ରହିନାହିଁ। ଏକଦିନ ହାତ ହଲାଇ ଭୋଟ ଝଡି ପଡୁଥିଲା, କିନ୍ତୁ ଆଜି ଲୋକେ ବିଜେଡିର ଠକାମୀକୁ ବୁଝିସାରିଛନ୍ତି।”

ଶ୍ରୀ ଜେନା ଅଭିଯୋଗ କରିଛନ୍ତି ଯେ, “ଏହି ନିର୍ବାଚନ ତ୍ରିମୁଖୀ ନୁହେଁ, ପ୍ରକୃତରେ ଦ୍ବିମୁଖୀ। ଗୋଟିଏ ପଟେ ବିଜେପି ମନ୍ତ୍ରୀ ଅଶ୍ୱିନୀ ବୈଷ୍ଣବ ଓ ବିଜେଡିର ପ୍ରମୁଖ ପାଣ୍ଡିଆନ ମିଶି ଲଢୁଛନ୍ତି, ଅନ୍ୟ ପଟେ ଏକାକୀ କଂଗ୍ରେସ। ବିଜେଡି ଜାଣିଶୁଣି ବାହାର ଜିଲ୍ଲାର ପ୍ରାର୍ଥୀ ଦେଇ ବିଜେପିକୁ ସହଯୋଗ କରୁଛି।”

ସେ ଆହୁରି କହିଛନ୍ତି ଯେ, “ପୂର୍ବରୁ ବିଜେଡି-ବିଜେପି ମିଳିତ ସରକାର ଥିଲା, ତଥାପି ତଳସାରା ଓ ଲକ୍ଷ୍ମୀପୁରରେ କଂଗ୍ରେସ ଜିତିଥିଲା। ଏଥର ଘାସିରାମ ମାଝୀ ମଧ୍ୟ ଜିତିବେ। ଆମ ପାଖରେ ଅର୍ଥବଳ ନାହିଁ, କିନ୍ତୁ ଯଥେଷ୍ଟ ଲୋକବଳ ଅଛି।”

ସେ ନବୀନ ପଟ୍ଟନାୟକଙ୍କ ନୂଆପଡା ଗସ୍ତକୁ “ନାଟକୀୟ ଦୃଶ୍ୟ” ବୋଲି ବିବେଚନା କରି କହିଲେ ଯେ, “ସେ କେବଳ ବିଜେପି ସହିତ ଆମେ ନୁହଁ ବୋଲି ଦେଖେଇବା ପାଇଁ ଆସିଛନ୍ତି।”

ସମ୍ମିଳନୀର ଅନ୍ୟତମ ବକ୍ତା ପୂର୍ବତନ ମନ୍ତ୍ରୀ ଦେବାଶିଷ ନାୟକ କହିଥିଲେ, “ନୂଆଦିଲ୍ଲୀରେ ଆଗରୁ ଡିଲ ସରିଯାଇଛି। ବିଜେଡି କେବଳ ଅଭିନୟ କରୁଛି ଯେ ନିର୍ବାଚନ ଲଢୁଛି। କିନ୍ତୁ କଂଗ୍ରେସ ସ୍ଥାନୀୟ ଆଦିବାସୀ ନେତାଙ୍କୁ ପ୍ରାର୍ଥୀ କରି ସତ୍ୟ ଏବଂ ସାମାଜିକ ନ୍ୟାୟ ମୁଦ୍ଦାରେ ନିର୍ବାଚନ ଲଢୁଛି।”

ଏହି ସାମ୍ବାଦିକ ସମ୍ମିଳନୀରେ ବରିଷ୍ଠ କଂଗ୍ରେସ ନେତା ଓ ମୁଖପାତ୍ର ମନୋରଞ୍ଜନ ଦାଶ ମଧ୍ୟ ଉପସ୍ଥିତ ଥିଲେ।(PNS)