ଭୁବନେଶ୍ୱରରେ ଓଡିଶା ପୋଲିସ ରେଳବାଇ ଓ ଉପକୂଳ ସୁରକ୍ଷା ଦକ୍ଷତା ବୃଦ୍ଧି କର୍ମଶାଳା ଅନୁଷ୍ଠିତ

କର୍ମଶାଳାର ଉଦ୍‌ଘାଟନ ଓଡିଶାର ଡିଜିପି ଶ୍ରୀ ଯୋଗେଶ ବାହାଦୁର ଖୁରାନିଆ, IPS କରିଥିଲେ। ସେ କହିଥିଲେ ଯେ ରେଳବାଇ ଓ ଉପକୂଳ ସୁରକ୍ଷାକୁ ମଜବୁତ ଓ ଆଧୁନିକ କରିବା ଓଡିଶା ପୋଲିସର ପ୍ରାଥମିକ ଲକ୍ଷ୍ୟ। ସେ ମାନବ ସମ୍ବଳ ବିକାଶ, ଆଧୁନିକ ପ୍ରଯୁକ୍ତି ବିଦ୍ୟା ଓ କାର୍ଯ୍ୟଶୈଳୀରେ ଉନ୍ନତି ଆଣିବାର ଉପରେ ଗୁରୁତ୍ୱ ଦେଇଥିଲେ।

ଡିଜିପି ଖୁରାନିଆ ତାଙ୍କ ବକ୍ତବ୍ୟରେ ଉଲ୍ଲେଖ କଲେ ଯେ ରାଜ୍ୟ ସରକାର ଓଡିଶା ପୋଲିସକୁ ଦେଶର ଶ୍ରେଷ୍ଠ ପୋଲିସ ବଳମାନଙ୍କ ମଧ୍ୟରେ ଗଣନୀୟ କରିବା ପାଇଁ ସମସ୍ତ ପ୍ରକାର ସହଯୋଗ ଓ ସାହାଯ୍ୟ ଯୋଗାଇ ଦେଉଛି। ସେ ଆହୁରି କହିଲେ ଯେ ଲୋକମାନଙ୍କୁ ଫଳପ୍ରଦ ପୋଲିସ ସେବା ଯୋଗାଇବା ପାଇଁ ଦକ୍ଷତା, ପ୍ରସ୍ତୁତି ଓ ସମନ୍ୱୟ ଅତ୍ୟନ୍ତ ଆବଶ୍ୟକ।

ଓଡିଶାରେ ସୁଦୀର୍ଘ ସମୁଦ୍ରତଟ ଥିବାରୁ ଉପକୂଳ ସୁରକ୍ଷାରେ ପୋଲିସର ଭୂମିକା ଗୁରୁତ୍ୱପୂର୍ଣ୍ଣ ବୋଲି ଡିଜିପି କହିଥିଲେ। ସେ କହିଥିଲେ ଯେ ରାଜ୍ୟ ସରକାର ଉପକୂଳ ସୁରକ୍ଷା ପାଇଁ ୧୪୯.୯୫ କୋଟି ଟଙ୍କା ଅନୁମୋଦନ କରିଛନ୍ତି ଓ ୧୦ଟି ଆଧୁନିକ ଡ୍ରୋନ୍‌, ୩ଟି ଟ୍ରଲର୍ ଓ ୧୪୦ ଜଣ ସ୍ୱତନ୍ତ୍ର ପୁଲିସ ଅଧିକାରୀଙ୍କୁ ନିଯୁକ୍ତ କରାଯାଇଛି। ଶୀଘ୍ର ରିୟଲ୍-ଟାଇମ୍ ସର୍ଭେଲାନ୍ସ ପାଇଁ ଏକ ଆଧୁନିକ କମାଣ୍ଡ ଓ କଣ୍ଟ୍ରୋଲ୍ ସେଣ୍ଟର ସ୍ଥାପନ କରାଯିବ।

ଡିଜିପି ଆହୁରି କହିଥିଲେ ଯେ ୩୨ଟି ମାଛ ଧରା ବନ୍ଦର ଓ ଫିଶିଂ ହାର୍ବରକୁ CCTV ସିଷ୍ଟମ୍‌ରେ ଆବୃତ କରିବା ପାଇଁ କାମ ଚାଲିଛି ଓ ନୂଆ ନୌକା କିଣିବା ପ୍ରକ୍ରିୟା ଆରମ୍ଭ ହୋଇଛି।

ରେଳବାଇ ପୁଲିସ ଆଧୁନିକୀକରଣ ପାଇଁ ମଧ୍ୟ ବିଶେଷ ପଦକ୍ଷେପ ଗ୍ରହଣ ହେଉଛି। ନୂତନ ରେଳବାଇ ପୁଲିସ ଜିଲ୍ଲା ଓ ନୂଆ GRPS ସୃଷ୍ଟି ପ୍ରକ୍ରିୟା ଚାଲିଛି ଏବଂ ସମସ୍ତ ୧୫ଟି GRPSରେ CCTV ମନିଟରିଂ ସେଣ୍ଟର ପାଇଁ ଅର୍ଥ ଅନୁମୋଦନ ହୋଇଛି।

ଏହି କର୍ମଶାଳାରେ ଅବସରପ୍ରାପ୍ତ ଡିଜିପି (ଗୁଜୁରାଟ) ଡା. କେଶବ କୁମାର, IPS “ଅପରାଧ ତଦନ୍ତରେ ବୈଷୟିକ ଜ୍ଞାନ ଓ କୌଶଳ” ବିଷୟରେ ଉପସ୍ଥାପନା କରିଥିଲେ। ଏହା ସହ ଭାରତୀୟ କୋଷ୍ଟ ଗାର୍ଡ କମାଣ୍ଡାଣ୍ଟ ଶ୍ରୀ ରବୀନ୍ଦ୍ର କୁମାର ସାମୁଦ୍ରିକ ସୁରକ୍ଷା ଆଇନ୍ ଓ ଅନ୍ତର୍ଜାତୀୟ ମାରିଟାଇମ୍ ନିୟମ ସମ୍ପର୍କରେ ଆଲୋକପାତ କରିଥିଲେ।

ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ (ରେଳବାଇ ଓ ଉପକୂଳ ସୁରକ୍ଷା) ଶ୍ରୀ ଅରୁଣ ବୋଥ୍ରା, IPS ସ୍ୱାଗତ ଭାଷଣ ଦେଇ ବୃତ୍ତିଗତ ଦକ୍ଷତା ଓ ସୁରକ୍ଷା ସମନ୍ୱୟ ବିଷୟରେ ମତବ୍ୟକ୍ତ କରିଥିଲେ।

ଶ୍ରୀ ଅଲୋକ ବୋହରା, IGP, RPF ବିଭିନ୍ନ ସୁରକ୍ଷା ଏଜେନ୍ସିମାନଙ୍କ ମଧ୍ୟରେ ସମନ୍ୱୟ ଓ ସହଯୋଗ ଆବଶ୍ୟକତା ଉପରେ ଗୁରୁତ୍ୱ ଦେଇଥିଲେ।

କାର୍ଯ୍ୟକ୍ରମ ଶେଷରେ AIG (ରେଳବାଇ ଓ ଉପକୂଳ ସୁରକ୍ଷା) ଶ୍ରୀ ସତ୍ୟଜିତ ମିଶ୍ର ଧନ୍ୟବାଦ ଜଣାଇଥିଲେ। ଏହି କର୍ମଶାଳାରେ ରେଳବାଇ ଓ ସାମୁଦ୍ରିକ ଥାନା ଅଧିକାରୀମାନେ ଯୋଗଦେଇଥିଲେ। (PNS)